
ਕੈਨੇਡਾ ਦੇ ਸਭ ਤੋਂ ਵੱਡੇ ਸ਼ਹਿਰ ਤੋਂ ਭਾਰਤ ਦੀ ਵਿੱਤੀ ਰਾਜਧਾਨੀ ਤੱਕ ਸਿੱਧੀ ਸੇਵਾ ਦੇਣ ਵਾਲੀ ਇਕਲੌਤੀ ਏਅਰਲਾਈਨ ਬਣੀ; ਨਵੇਂ ਕੈਬਿਨ, ਵਾਈ-ਫਾਈ ਤੇ ਪ੍ਰੀਮੀਅਮ ਸੀਟਾਂ ਨਾਲ ਯਾਤਰੀਆਂ ਨੂੰ ਮਿਲੇਗੀ ਸਹੂਲਤ
ਏਅਰ ਇੰਡੀਆ ਨੇ ਇੱਕ ਹੋਰ ਪਹਿਲ ਆਪਣੇ ਨਾਂ ਕਰ ਲਈ ਹੈ। ਅਗਸਤ ਵਿੱਚ ਪ੍ਰਸਿੱਧ ਟੋਰਾਂਟੋ-ਦਿੱਲੀ ਰੂਟ ’ਤੇ ਬੋਇੰਗ 787-9 ਜਹਾਜ਼ ਸ਼ੁਰੂ ਕਰਨ ਤੋਂ ਬਾਅਦ, ਏਅਰ ਇੰਡੀਆ ਨੇ ਹੁਣ ਟੋਰਾਂਟੋ ਅਤੇ ਮੁੰਬਈ ਵਿਚਕਾਰ ਆਪਣੀ ਨਵੀਂ ਸੇਵਾ ਸ਼ੁਰੂ ਕਰ ਦਿੱਤੀ ਹੈ। ਇਸ ਨਾਲ ਕੈਨੇਡਾ ਦੇ ਸਭ ਤੋਂ ਵੱਡੇ ਸ਼ਹਿਰ ਅਤੇ ਭਾਰਤ ਦੀ ਵਿੱਤੀ ਰਾਜਧਾਨੀ ਵਿਚਕਾਰ ਸਿੱਧੀ ਹਵਾਈ ਸੇਵਾ ਦੇਣ ਵਾਲੀ ਏਅਰ ਇੰਡੀਆ ਇਕਲੌਤੀ ਏਅਰਲਾਈਨ ਬਣ ਗਈ ਹੈ।
ਪਿਛਲੇ ਕੁਝ ਸਮੇਂ ਦੌਰਾਨ ਭਾਰਤ ਅਤੇ ਕੈਨੇਡਾ ਨੇ ਦੁਵੱਲੇ ਵਪਾਰ ਨੂੰ ਵਧਾਉਂਦਿਆਂ ਆਪਸੀ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕੀਤਾ ਹੈ ਅਤੇ ਸਾਲ ਦੇ ਅੰਤ ਤੱਕ ਮੁਕਤ ਵਪਾਰ ਸਮਝੌਤੇ ’ਤੇ ਦਸਤਖ਼ਤ ਕਰਨ ਦੇ ਨੇੜੇ ਪਹੁੰਚਣ ਦੀ ਕੋਸ਼ਿਸ਼ ਕੀਤੀ ਹੈ।
ਏਅਰ ਇੰਡੀਆ ਦੀਆਂ ਨਵੀਆਂ ਪਹਿਲਕਦਮੀਆਂ ਦਾ ਕੈਨੇਡਾ ਵਿੱਚ ਵੱਸਦੇ ਮਜ਼ਬੂਤ ਭਾਰਤੀ ਭਾਈਚਾਰੇ ਨੇ ਸਵਾਗਤ ਕੀਤਾ ਹੈ। ਇਹ ਭਾਈਚਾਰਾ ਲੰਮੇ ਸਮੇਂ ਤੋਂ ਦੋਵਾਂ ਮਿੱਤਰ ਦੇਸ਼ਾਂ ਵਿਚਕਾਰ ਬਿਹਤਰ ਹਵਾਈ ਸੰਪਰਕ ਦੀ ਮੰਗ ਕਰ ਰਿਹਾ ਸੀ, ਕਿਉਂਕਿ ਦੋਵਾਂ ਦੇਸ਼ਾਂ ਦੇ ਲੋਕਾਂ ਵਿਚਕਾਰ ਮਜ਼ਬੂਤ ਆਪਸੀ ਸਬੰਧ ਹਨ।
ਇਹ ਨਵਾਂ ਰੂਟ ਦੁਨੀਆ ਦੇ ਸਭ ਤੋਂ ਵੱਡੇ ਪਰਵਾਸੀ ਭਾਈਚਾਰਿਆਂ ਵਾਲੇ ਹਵਾਈ ਮਾਰਗਾਂ ਵਿੱਚੋਂ ਇੱਕ ’ਤੇ ਸੰਪਰਕ ਨੂੰ ਮਜ਼ਬੂਤ ਕਰੇਗਾ। ਇਸ ਦੇ ਨਾਲ ਹੀ ਭਾਰਤ ਅਤੇ ਕੈਨੇਡਾ ਵਿਚਕਾਰ ਵਧ ਰਹੇ ਕਾਰੋਬਾਰੀ, ਵਪਾਰਕ, ਸੈਰ-ਸਪਾਟਾ ਅਤੇ ਨਿਵੇਸ਼ ਸਬੰਧਾਂ ਨੂੰ ਵੀ ਹੁਲਾਰਾ ਮਿਲੇਗਾ।
ਉਦਘਾਟਨੀ ਉਡਾਣ (AI192) ਐਤਵਾਰ ਨੂੰ ਦੁਪਹਿਰ 12:30 ਵਜੇ ਟੋਰਾਂਟੋ ਪੀਅਰਸਨ ਹਵਾਈ ਅੱਡੇ ਤੋਂ ਰਵਾਨਾ ਹੋਈ ਅਤੇ ਸੋਮਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ 2:10 ਵਜੇ ਮੁੰਬਈ ਪਹੁੰਚਣ ਦਾ ਸਮਾਂ ਤੈਅ ਸੀ।
ਟੋਰਾਂਟੋ-ਮੁੰਬਈ ਵਿਚਕਾਰ ਇਹ ਨਵੀਂ ਸਿੱਧੀ ਸੇਵਾ ਅਜਿਹੇ ਸਮੇਂ ਸ਼ੁਰੂ ਕੀਤੀ ਗਈ ਹੈ, ਜਦੋਂ ਦੋਵਾਂ ਦੇਸ਼ਾਂ ਦੇ ਪ੍ਰਧਾਨ ਮੰਤਰੀਆਂ ਦੀਆਂ ਆਪਸੀ ਯਾਤਰਾਵਾਂ ਦੀ ਸੰਭਾਵਨਾ ਹੈ। ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਅਗਲੇ ਮਹੀਨੇ ਕੈਨੇਡਾ ਦੇ ਅਧਿਕਾਰਤ ਦੌਰੇ ’ਤੇ ਜਾਣ ਦੀ ਉਮੀਦ ਹੈ, ਜਦਕਿ ਉਨ੍ਹਾਂ ਦੇ ਕੈਨੇਡੀਅਨ ਹਮਰੁਤਬਾ ਮਾਰਕ ਕਾਰਨੀ ਦੇ ਭਾਰਤ ਦੇ ਸਭ ਤੋਂ ਵੱਡੇ ਤਿਉਹਾਰਾਂ ਵਿੱਚੋਂ ਇੱਕ ਗਣਤੰਤਰ ਦਿਵਸ ਦੇ ਆਸ-ਪਾਸ ਨਵੀਂ ਦਿੱਲੀ ਆਉਣ ਦੀ ਸੰਭਾਵਨਾ ਹੈ।
ਏਅਰ ਇੰਡੀਆ ਅਤੇ ਟੋਰਾਂਟੋ ਪੀਅਰਸਨ ਹਵਾਈ ਅੱਡੇ ਨੇ ਇਸ ਸੇਵਾ ਦੀ ਸ਼ੁਰੂਆਤ ਮੌਕੇ ਇੱਕ ਸਮਾਗਮ ਕਰਵਾਇਆ। ਇਸ ਵਿੱਚ ਸਰਕਾਰੀ ਅਧਿਕਾਰੀਆਂ ਸਮੇਤ ਟੋਰਾਂਟੋ ਵਿੱਚ ਭਾਰਤ ਦੇ ਕੌਂਸਲ ਜਨਰਲ ਮਹਾਵੀਰ ਸਿੰਘਵੀ, ਹਵਾਬਾਜ਼ੀ ਉਦਯੋਗ ਨਾਲ ਜੁੜੇ ਨੁਮਾਇੰਦਿਆਂ, ਯਾਤਰਾ ਕਾਰੋਬਾਰ ਦੇ ਭਾਈਵਾਲਾਂ ਅਤੇ ਏਅਰ ਇੰਡੀਆ ਤੇ ਟੋਰਾਂਟੋ ਪੀਅਰਸਨ ਦੇ ਕਰਮਚਾਰੀਆਂ ਨੇ ਸ਼ਿਰਕਤ ਕੀਤੀ।
ਏਅਰ ਇੰਡੀਆ ਦੀ ਨਵੀਂ ਮੁੰਬਈ-ਟੋਰਾਂਟੋ ਸੇਵਾ ਨਾਲ ਕੈਨੇਡਾ ਅਤੇ ਭਾਰਤ ਵਿਚਕਾਰ ਹਰ ਹਫ਼ਤੇ ਲਗਪਗ 2,000 ਵਾਧੂ ਸੀਟਾਂ ਉਪਲਬਧ ਹੋਣਗੀਆਂ। ਇਸ ਨਾਲ ਗ੍ਰੇਟਰ ਟੋਰਾਂਟੋ ਖੇਤਰ ਦੇ ਯਾਤਰੀਆਂ ਨੂੰ ਭਾਰਤ ਦੀ ਵਿੱਤੀ ਰਾਜਧਾਨੀ ਤੱਕ ਸਿੱਧੀ ਪਹੁੰਚ ਮਿਲੇਗੀ। ਇਸ ਤੋਂ ਇਲਾਵਾ ਮੁੰਬਈ ਰਾਹੀਂ ਏਅਰ ਇੰਡੀਆ ਦੇ ਘਰੇਲੂ ਅਤੇ ਅੰਤਰਰਾਸ਼ਟਰੀ ਨੈੱਟਵਰਕ ਦੀਆਂ ਹੋਰ ਮੰਜ਼ਿਲਾਂ ਤੱਕ ਜਾਣ ਲਈ ਵੀ ਸੁਵਿਧਾਜਨਕ ਸੰਪਰਕ ਮਿਲੇਗਾ।
ਓਏਜੀ ਟ੍ਰੈਫਿਕ ਐਨਾਲਾਈਜ਼ਰ ਦੇ ਅੰਕੜਿਆਂ ਅਨੁਸਾਰ, ਜੂਨ 2025 ਤੋਂ ਮਈ 2026 ਦਰਮਿਆਨ ਮੁੰਬਈ ਅਤੇ ਟੋਰਾਂਟੋ ਵਿਚਕਾਰ ਲਗਪਗ 1,28,000 ਯਾਤਰੀਆਂ ਨੇ ਆਉਣ-ਜਾਣ ਦੀ ਯਾਤਰਾ ਕੀਤੀ।
ਇਹ ਸੇਵਾ ਅਜਿਹੇ ਸਮੇਂ ਸ਼ੁਰੂ ਹੋਈ ਹੈ, ਜਦੋਂ ਭਾਰਤ ਅਤੇ ਕੈਨੇਡਾ ਆਰਥਿਕ ਸਬੰਧਾਂ ਨੂੰ ਹੋਰ ਡੂੰਘਾ ਕਰਨ ਲਈ ਸਰਗਰਮੀ ਨਾਲ ਯਤਨ ਕਰ ਰਹੇ ਹਨ। ਪ੍ਰਸਤਾਵਿਤ ਵਿਆਪਕ ਆਰਥਿਕ ਭਾਈਵਾਲੀ ਸਮਝੌਤੇ (ਸੀਈਪੀਏ) ਤੋਂ 2030 ਤੱਕ ਦੁਵੱਲੇ ਵਪਾਰ ਨੂੰ ਦੁੱਗਣਾ ਕਰਨ ਦੇ ਯਤਨਾਂ ਨੂੰ ਸਮਰਥਨ ਮਿਲਣ ਦੀ ਉਮੀਦ ਹੈ। ਇਸ ਨਾਲ ਦੋਵਾਂ ਦੇਸ਼ਾਂ ਦੇ ਕਾਰੋਬਾਰੀਆਂ, ਨਿਵੇਸ਼ਕਾਂ ਅਤੇ ਉੱਦਮੀਆਂ ਲਈ ਨਵੇਂ ਮੌਕੇ ਪੈਦਾ ਹੋਣਗੇ।
ਏਅਰ ਇੰਡੀਆ ਦੀ ਨਵੀਂ ਟੋਰਾਂਟੋ-ਮੁੰਬਈ ਸੇਵਾ ਵਿੱਚ ਅਪਗ੍ਰੇਡ ਕੀਤੇ ਕੈਬਿਨ ਵਾਲੇ ਬੋਇੰਗ 777-300ER ਜਹਾਜ਼ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਇਸ ਜਹਾਜ਼ ਵਿੱਚ ਨਿੱਜਤਾ ਲਈ ਦਰਵਾਜ਼ਿਆਂ ਵਾਲੇ ਫਸਟ ਕਲਾਸ ਦੇ ਅੱਠ ਸੂਟ, ਬਿਜ਼ਨਸ ਕਲਾਸ ਦੀਆਂ 40 ਪੂਰੀ ਤਰ੍ਹਾਂ ਸਮਤਲ ਹੋਣ ਵਾਲੀਆਂ ਸੀਟਾਂ ਅਤੇ ਇਕਾਨਮੀ ਕਲਾਸ ਦੀਆਂ 280 ਸੀਟਾਂ ਹਨ। ਇਸ ਰੂਟ ’ਤੇ ਯਾਤਰਾ ਕਰਨ ਵਾਲੇ ਯਾਤਰੀ ਪੂਰੀ ਯਾਤਰਾ ਦੌਰਾਨ ਵਾਈ-ਫਾਈ ਦੀ ਸਹੂਲਤ ਦਾ ਵੀ ਲਾਭ ਲੈ ਸਕਣਗੇ, ਜਿਸ ਨਾਲ ਮਹਾਂਦੀਪਾਂ ਵਿਚਕਾਰ ਉਡਾਣ ਦੌਰਾਨ ਵੀ ਸੰਪਰਕ ਬਣਾਈ ਰੱਖਣਾ ਸੰਭਵ ਹੋਵੇਗਾ।
ਏਅਰ ਇੰਡੀਆ ਨੇ ਹਾਲ ਹੀ ਵਿੱਚ ਰੋਜ਼ਾਨਾ ਟੋਰਾਂਟੋ-ਦਿੱਲੀ ਰੂਟ ’ਤੇ ਆਪਣੇ ਨਵੇਂ ਬੋਇੰਗ 787-9 ਜਹਾਜ਼ ਸ਼ੁਰੂ ਕੀਤੇ ਹਨ। ਇਸ ਨਾਲ ਕੈਨੇਡਾ ਵਿੱਚ ਏਅਰਲਾਈਨ ਦੇ ਨਵੇਂ ਕੈਬਿਨ ਉਤਪਾਦ ਦੀ ਸ਼ੁਰੂਆਤ ਹੋਈ ਅਤੇ ਇਸ ਰੂਟ ’ਤੇ ਪਹਿਲੀ ਵਾਰ ਪ੍ਰੀਮੀਅਮ ਇਕਾਨਮੀ ਕਲਾਸ ਦੀ ਸਹੂਲਤ ਦਿੱਤੀ ਗਈ। ਦਿੱਲੀ ਲਈ ਨਵੇਂ ਜਹਾਜ਼ ਅਤੇ ਮੁੰਬਈ ਲਈ ਅਪਗ੍ਰੇਡ ਕੀਤੇ ਬੋਇੰਗ 777-300ER ਦੇ ਸੰਚਾਲਨ ਨਾਲ ਇਸ ਸਰਦੀ ਦੇ ਮੌਸਮ ਵਿੱਚ ਟੋਰਾਂਟੋ ਅਤੇ ਭਾਰਤ ਵਿਚਕਾਰ ਏਅਰ ਇੰਡੀਆ ਦੀਆਂ ਪ੍ਰੀਮੀਅਮ ਸੀਟਾਂ ਦੀ ਸਮਰੱਥਾ ਵਿੱਚ 71 ਫ਼ੀਸਦੀ ਵਾਧਾ ਹੋਵੇਗਾ।
ਜਨਵਰੀ 2027 ਤੋਂ ਟੋਰਾਂਟੋ ਪੀਅਰਸਨ ਹਵਾਈ ਅੱਡੇ ਤੋਂ ਉਡਾਣ ਭਰਨ ਵਾਲੀਆਂ ਏਅਰ ਇੰਡੀਆ ਦੀਆਂ ਸਾਰੀਆਂ ਉਡਾਣਾਂ ਵਿੱਚ ਨਵੇਂ ਜਾਂ ਵੱਡੇ ਪੱਧਰ ’ਤੇ ਅਪਗ੍ਰੇਡ ਕੀਤੇ ਕੈਬਿਨ ਹੋਣਗੇ।
ਏਅਰ ਇੰਡੀਆ ਦੇ ਮੁੱਖ ਵਪਾਰਕ ਅਧਿਕਾਰੀ ਨਿਪੁਣ ਅਗਰਵਾਲ ਨੇ ਕਿਹਾ, “ਕੈਨੇਡਾ ਲੰਮੇ ਸਮੇਂ ਤੋਂ ਏਅਰ ਇੰਡੀਆ ਦੇ ਅੰਤਰਰਾਸ਼ਟਰੀ ਨੈੱਟਵਰਕ ਦਾ ਇੱਕ ਮਹੱਤਵਪੂਰਨ ਹਿੱਸਾ ਰਿਹਾ ਹੈ ਅਤੇ ਇਹ ਸਾਡੇ ਸਭ ਤੋਂ ਵੱਡੇ ਵਿਦੇਸ਼ੀ ਬਾਜ਼ਾਰਾਂ ਵਿੱਚੋਂ ਇੱਕ ਹੈ। ਜਦੋਂ ਅਸੀਂ ਏਅਰ ਇੰਡੀਆ ਨੂੰ ਬਦਲ ਰਹੇ ਹਾਂ, ਤਾਂ ਇਹ ਸੁਭਾਵਿਕ ਹੈ ਕਿ ਕੈਨੇਡਾ ਤੋਂ ਆਉਣ ਵਾਲੇ ਸਾਡੇ ਯਾਤਰੀ ਸਾਡੀ ਏਅਰਲਾਈਨ ਵਿੱਚ ਕੀਤੇ ਜਾ ਰਹੇ ਕਈ ਸੁਧਾਰਾਂ ਦਾ ਅਨੁਭਵ ਕਰਨ ਵਾਲਿਆਂ ਵਿੱਚ ਸਭ ਤੋਂ ਅੱਗੇ ਹੋਣ। ਨਵੇਂ ਟੋਰਾਂਟੋ-ਮੁੰਬਈ ਰੂਟ ਦੀ ਸ਼ੁਰੂਆਤ, ਦਿੱਲੀ ਲਈ ਸਾਡੇ ਨਵੇਂ ਜਹਾਜ਼ਾਂ ਦੀ ਤਾਇਨਾਤੀ ਅਤੇ ਪ੍ਰੀਮੀਅਮ ਸੀਟਾਂ ਦੀ ਸਮਰੱਥਾ ਵਿੱਚ ਵੱਡਾ ਵਾਧਾ—ਇਹ ਸਭ ਇਸ ਬਾਜ਼ਾਰ ਪ੍ਰਤੀ ਸਾਡੇ ਭਰੋਸੇ ਅਤੇ ਭਾਰਤ ਤੇ ਕੈਨੇਡਾ ਵਿਚਕਾਰ ਵਿਸ਼ਵ ਪੱਧਰੀ ਯਾਤਰਾ ਅਨੁਭਵ ਦੇਣ ਦੀ ਸਾਡੀ ਵਚਨਬੱਧਤਾ ਨੂੰ ਦਰਸਾਉਂਦੇ ਹਨ।”
ਟੋਰਾਂਟੋ ਪੀਅਰਸਨ ਦੇ ਮੁੱਖ ਵਪਾਰਕ ਅਧਿਕਾਰੀ ਕੁਰੁਸ਼ ਮਿਨੋਚਰ ਨੇ ਕਿਹਾ, “ਇਹ ਨਵਾਂ ਰੂਟ ਟੋਰਾਂਟੋ ਪੀਅਰਸਨ ਦੇ ਲਗਾਤਾਰ ਵਧ ਰਹੇ ਵਿਸ਼ਵਵਿਆਪੀ ਨੈੱਟਵਰਕ ਵਿੱਚ ਇੱਕ ਮਹੱਤਵਪੂਰਨ ਵਾਧਾ ਹੈ। ਇਹ ਟੋਰਾਂਟੋ ਅਤੇ ਭਾਰਤ ਦੀ ਵਿੱਤੀ ਰਾਜਧਾਨੀ ਮੁੰਬਈ ਵਿਚਕਾਰ ਇਕਲੌਤਾ ਸਿੱਧਾ ਸੰਪਰਕ ਪ੍ਰਦਾਨ ਕਰਦਾ ਹੈ। ਇਹ ਸੇਵਾ ਯਾਤਰੀਆਂ ਲਈ ਸੰਪਰਕ ਨੂੰ ਮਜ਼ਬੂਤ ਕਰੇਗੀ, ਕੈਨੇਡਾ ਅਤੇ ਭਾਰਤ ਵਿਚਕਾਰ ਕਾਰੋਬਾਰ ਤੇ ਵਪਾਰ ਨੂੰ ਸਮਰਥਨ ਦੇਵੇਗੀ ਅਤੇ ਟੋਰਾਂਟੋ ਪੀਅਰਸਨ ਦੀ ਇੱਕ ਪ੍ਰਮੁੱਖ ਅੰਤਰਰਾਸ਼ਟਰੀ ਪ੍ਰਵੇਸ਼ ਦੁਆਰ ਵਜੋਂ ਭੂਮਿਕਾ ਨੂੰ ਹੋਰ ਮਜ਼ਬੂਤ ਕਰੇਗੀ।”
ਮੁੰਬਈ-ਟੋਰਾਂਟੋ ਉਡਾਣਾਂ ਸ਼ੁਰੂ ਹੋਣ ਨਾਲ ਉੱਤਰੀ ਸਰਦੀਆਂ ਦੇ 2026-27 ਸੀਜ਼ਨ ਦੌਰਾਨ ਏਅਰ ਇੰਡੀਆ ਭਾਰਤ ਅਤੇ ਕੈਨੇਡਾ ਵਿਚਕਾਰ ਹਰ ਹਫ਼ਤੇ 20 ਉਡਾਣਾਂ ਚਲਾਏਗੀ। ਇਨ੍ਹਾਂ ਵਿੱਚ ਮੁੰਬਈ-ਟੋਰਾਂਟੋ, ਦਿੱਲੀ-ਟੋਰਾਂਟੋ ਅਤੇ ਦਿੱਲੀ-ਵੈਨਕੂਵਰ ਰੂਟ ਸ਼ਾਮਲ ਹਨ।
ਏਅਰ ਇੰਡੀਆ ਗਰੁੱਪ, ਜਿਸ ਵਿੱਚ ਪੂਰੀਆਂ ਸੇਵਾਵਾਂ ਦੇਣ ਵਾਲੀ ਵਿਸ਼ਵਵਿਆਪੀ ਏਅਰਲਾਈਨ ਏਅਰ ਇੰਡੀਆ ਅਤੇ ਕਿਫ਼ਾਇਤੀ ਹਵਾਈ ਸੇਵਾ ਦੇਣ ਵਾਲੀ ਏਅਰ ਇੰਡੀਆ ਐਕਸਪ੍ਰੈੱਸ ਸ਼ਾਮਲ ਹਨ, ਭਾਰਤੀ ਹਵਾਬਾਜ਼ੀ ਦੇ ਨਵੇਂ ਦੌਰ ਦੀ ਅਗਵਾਈ ਕਰ ਰਿਹਾ ਹੈ। ਏਅਰ ਇੰਡੀਆ ਦੀ ਕਹਾਣੀ 1932 ਵਿੱਚ ਸ਼ੁਰੂ ਹੋਈ ਸੀ, ਜਦੋਂ ਜੇ.ਆਰ.ਡੀ. ਟਾਟਾ ਨੇ ਏਅਰਲਾਈਨ ਦੀ ਪਹਿਲੀ ਉਡਾਣ ਖ਼ੁਦ ਉਡਾਈ ਅਤੇ ਭਾਰਤ ਵਿੱਚ ਹਵਾਬਾਜ਼ੀ ਦੇ ਖੇਤਰ ਲਈ ਰਾਹ ਖੋਲ੍ਹਿਆ। ਅੱਜ ਏਅਰ ਇੰਡੀਆ ਗਰੁੱਪ ਵਿੱਚ 30,000 ਤੋਂ ਵੱਧ ਕਰਮਚਾਰੀ ਹਨ। ਇਸ ਕੋਲ 300 ਤੋਂ ਵੱਧ ਜਹਾਜ਼ ਹਨ ਅਤੇ ਇਹ ਪੰਜ ਮਹਾਂਦੀਪਾਂ ਵਿੱਚ 60 ਘਰੇਲੂ ਤੇ 51 ਅੰਤਰਰਾਸ਼ਟਰੀ ਮੰਜ਼ਿਲਾਂ ਤੱਕ ਯਾਤਰੀਆਂ ਨੂੰ ਲਿਜਾਂਦਾ ਹੈ।
ਸਰਕਾਰ ਦੀ ਮਲਕੀਅਤ ਹੇਠ 70 ਸਾਲ ਰਹਿਣ ਤੋਂ ਬਾਅਦ 2022 ਵਿੱਚ ਟਾਟਾ ਸੰਨਜ਼ ਕੋਲ ਵਾਪਸ ਆਇਆ ਏਅਰ ਇੰਡੀਆ ਗਰੁੱਪ ਇਸ ਸਮੇਂ ਪੰਜ ਸਾਲਾ ਤਬਦੀਲੀ ਪ੍ਰੋਗਰਾਮ ‘ਵਿਹਾਨ.ਏਆਈ’ ਤਹਿਤ ਕੰਮ ਕਰ ਰਿਹਾ ਹੈ। ਇਸ ਪ੍ਰੋਗਰਾਮ ਦੇ ਹਿੱਸੇ ਵਜੋਂ ਏਅਰ ਇੰਡੀਆ ਨੇ 600 ਨਵੇਂ ਜਹਾਜ਼ਾਂ ਦੇ ਆਰਡਰ ਦਿੱਤੇ ਹਨ। ਨਵੇਂ ਜਹਾਜ਼ਾਂ ਦੀ ਡਿਲੀਵਰੀ ਲੈਣ ਦੇ ਨਾਲ-ਨਾਲ ਏਅਰਲਾਈਨ ਆਪਣੇ ਪੁਰਾਣੇ ਜਹਾਜ਼ਾਂ ਦੇ ਕੈਬਿਨਾਂ ਨੂੰ ਵੀ ਪੜਾਅਵਾਰ ਆਧੁਨਿਕ ਬਣਾ ਰਹੀ ਹੈ।
ਏਅਰ ਇੰਡੀਆ ਗਰੁੱਪ ਗੁਰੂਗ੍ਰਾਮ, ਭਾਰਤ ਵਿੱਚ ਦੱਖਣੀ ਏਸ਼ੀਆ ਦੀ ਸਭ ਤੋਂ ਵੱਡੀ ਹਵਾਬਾਜ਼ੀ ਸਿਖਲਾਈ ਅਕੈਡਮੀ ਚਲਾਉਂਦਾ ਹੈ। ਇਸ ਦੇ ਨਾਲ ਹੀ ਇੱਕ ਨਵੇਂ ਫਲਾਇੰਗ ਸਕੂਲ ਅਤੇ ਗ੍ਰੀਨਫੀਲਡ ਜਹਾਜ਼ ਰੱਖ-ਰਖਾਅ ਕੇਂਦਰ ਦਾ ਨਿਰਮਾਣ ਵੀ ਜਾਰੀ ਹੈ।
ਕਾਰੋਬਾਰ ਦੇ ਹਰ ਖੇਤਰ ਵਿੱਚ ਤਬਦੀਲੀ ਅਤੇ ਭਾਰਤ ਦੀ ਅਮੀਰ ਮਹਿਮਾਨਨਵਾਜ਼ੀ ਦੀ ਵਿਰਾਸਤ ਨੂੰ ਨਾਲ ਲੈ ਕੇ ਏਅਰ ਇੰਡੀਆ ਇੱਕ ਭਾਰਤੀ ਦਿਲ ਵਾਲੀ ਵਿਸ਼ਵ ਪੱਧਰੀ ਏਅਰਲਾਈਨ ਬਣਨ ਲਈ ਵਚਨਬੱਧ ਹੈ।

No comments yet
Comments are closed.